សេអ៊ូល៖ ប្រធានរដ្ឋសភាជាតិ នៃសាធារណរដ្ឋកូរ៉េ លោក Park Byeong-Seung បានទទួលពិធីលៀងសាយភោជន៍ជូនសម្ដេចតេជោ ហ៊ុន សែន នៅល្ងាចថ្ងៃទី១២ ខែកុម្ភៈ នេះនៅនាវាសនដ្ឋានលោកដោយផ្ទាល់ក្នុងទីក្រុងសេអ៊ូល ប្រទេសកូរ៉េខាងត្បូង។

ពិធីលៀងសាយភោជន៍ដែលប្រារព្ធធ្វើឡើងនៅនិវេសនដ្ឋានរបស់ប្រធានសភាកូរ៉េខាងត្បូងនេះ លោក Park Byeong-Seung បានសម្ដែងការចូលរួមអបអរសាទរ ជូនចំពោះសម្តេចតេជោនាយករដ្ឋមន្ត្រីដែលទទួលបានពានរង្វាន់សន្តិភាពស៊ុនហាក់ គឺស័ក្តិសមទៅនឹងគុណតម្លៃ និងមហាពលីកម្ម សាច់ស្រស់ឈាមស្រស់ របស់សម្តេចតេជោនាយករដ្ឋមន្ត្រី ក្នុងបុព្វហេតុសន្តិភាព និងការអភិវឌ្ឍប្រទេសកម្ពុជា។

នៅក្នុងពិធីលៀងសាយភោជន៍នោះដែរ លោកប្រធានរដ្ឋសភា កូរ៉េ និងសម្តេចតេជោនាយករដ្ឋមន្ត្រី បានធ្វើការពិភាក្សាយ៉ាងយកចិត្តទុកដាក់ដល់ការពង្រឹងពង្រីកទំនាក់ទំនង និងកិច្ចសហប្រតិបត្តិការលើគ្រប់វិស័យ នៃប្រទេសទាំងពីរ កម្ពុជា-កូរ៉េ។ ជាមួយគ្នានេះ សម្តេចតេជោក៏បានថ្លែងអំណរគុណជូនចំពោះរដ្ឋសភាកូរ៉េដែលបានគាំទ្រនូវគម្រោងនានាដែលប្រធានាធិបតី នៃសាធារណរដ្ឋកូរ៉េបានស្នើឲ្យរដ្ឋសភាធ្វើការគាំទ្រ និងផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីកម្ពុជា- កូរ៉េ ។

សម្ដេចតេជោ និងប្រធានសភាកូរ៉េ ក៏បានពិភាក្សាលើបញ្ហាជាច្រើនទៀត ដែលនាំមកនូវផលប្រយោជន៍សម្រាប់ប្រទេស និងប្រជាជនទាំងពីរកម្ពុជា-សាធារណរដ្ឋកូរ៉េ ពិសេសការជួយគ្នាទៅវិញទៅមក ការផ្លាស់ប្តូររវាងប្រជាជន និងប្រជាជន រួមទាំងបញ្ហាជាច្រើនទៀតដែលបម្រើឲ្យតម្រូវការរបស់ប្រទេស និងប្រជាជននៃប្រទេសទាំងពីរ។

នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានធ្វើដំណើរទៅកាន់ទីក្រុងសេអ៊ូលសាធារណរដ្ឋកូរ៉េកាលពីថ្ងៃទី១០ ខែកុម្ភៈ ឆ្នាំ២០២២ ដើម្បីចូលរួមធ្វើជាសហប្រធានក្នុងកិច្ចប្រជុំកំពូលសន្តិភាពពិភពលោកឆ្នាំ២០២២។ ក្នុងដំណើរទស្សនកិច្ចរយៈពេល ៤ថ្ងៃនេះ សម្តេចតេជោក៏បានជួបជាមួយនឹងថ្នាក់ដឹកនាំកំពូលកំពូលរបស់សាធារណរដ្ឋកូរ៉េដែលមានដូចជាប្រធានាធិបតីកូរ៉េ និងប្រធានរដ្ឋសភានៃប្រទេសនេះ និងបុគ្គលល្បីៗមួយចំនួនទៀតផងដែរ៕